الكاتب: دعوة للجميع

النت عالم عجيب جداً لأن فيه كل شيء ممكن نفكر نتخيله، الإنترنت بيفكرني بالفانوس السحري اللي جواه عفريت أول ما نتحسسه بأصابعنا نجد من يقول لنا " شيبك لبيك عبدك وبين إيديك"، وفعلاً بين أصابعنا لوحة مفاتيح نستطيع أن نسافر عبر السحاب لكل بقاع الأرض. فتقدر تعمل علاقات مع الناس من أي مكان في الدنيا، وتتكلم معاهم وتشوفهم لو عندك ويب كام وكأنك معاهم في نفس المكان..
ولأن الإنترنت بحر كله أسرار وحكايات فهكشف ليكم عن بعض من مغامراتي على الإنترنت.
أحيانا تبدأ المغامرة لما تتعلم شيء جديد فمن كذا سنة اتعلمت إزاي اعمل تشات، حصلت معايا مغامرات.
وأحيانا تبدأ المغامرة لما تتعلم برنامج أو تتعرف على مواقع جديدة ومثيرة وتشدك لدرجة الإدمان.
بكدة تبدأ المغامرة على الإنترنت..
مغامرتي كانت بدايتها مع تعلمي لأحد برامج الشات ، أنا بعمل شات من زمان وبصراحة صاحبت بنات كتير، بس المرة دي حسيت أني بحب بجد، وبالرغم من أني مش صغير فسني 25 سنة يعني فاهم كويس أنا بعمل إيه وعارف طريقي في الحياة، بس فجأة حسيت إني منجذب قوي لرغد (أسم مستعار) وحسيت إني نفسي أتكلم معاها كتير لدرجة إننا كنا بنتكلم بالساعات، اللي جذبني للبنت دي حاجة غربية شوية مش متعود ألاقيها على الشات وهي أن البنت صريحة قوي معندهاش مانع تقول اللي جواها مهما كانت النتائج وبالرغمن من كدة مؤدبة جداً.
رغد بنت مؤدبة قوي وصريحة قوي، وده خلاني أتعلق بيها وأحس إني نفسي نبقى أصدقاء ومع الوقت حسيت إني مرتبط بيها وبافكر فيها كتير، وبالرغم إني مش بحبذ إني ارتبط عن طريق النت، لأن عندي تحفظات كتير على الطريقة دي، قررت في نفسي إني أفكر في الحكاية بجد، وفتحت الحكاية مع رغد وقلتلها بدون مقدمات، فالكلام على النت بيخلينا أقل خجل من الطبيعي ومعندناش مشكلة أننا نعبر عن مشاعرنا ودا اللي بيخلي شباب وبنات كتير تدخل على النت علشان يقولوا اللي مش عارفين يقولوه في الحقيقة.
فاجأتها وقلت: رغد أنا عاوز ارتبط بيكي، بعد الاندهاش والسكوت اللي بيخرج من البنات في المواقف دي..
قالتلي - ولأنها صريحة - أنا لسة كنت في قصة حب مطلعتش منها، ولذلك أنا مش هاقدر أفكر في أي ارتباط دلوقتي وبعدين أنت مشتفنيش ولسة متعرفنيش كويس.
أنا جالي فضول غير عادي أني اعرف مين اللي رغد متعلقة بيه. وهل هترتبط بالشاب ده ولا لأ؟
وكملت بقية المغامرة لما عرفت أنها أتعلقت بحد أتعرفت بيه عن طريق النت من غير ما تشوفه.
وقالتلي أنها مش بتفكر ترتبط بيه لأن ظروفه صعبة قوي.
وهنا كبر جوايا سؤال المغامرة وهو "هل ممكن الحب عن طريق النت"؟
كنت عرفت في فترات سابقة عن ناس ارتبطوا عن طريق النت ولما كنت بتكلم مع رغد قالتلي أنها مؤمنة بالحب عن طريق النت، فالنت وسيلة تعارف زي أي وسيلة أخرى ممكن تؤدي بارتباط فاشل أو ارتباط ناجح.

بين الحب والإعجاب
في دنيا الإنترنت تتقابل مع كل أنواع البشر، منهم من يكتشف أنهم يتفقوا معك في الاتجاهات والأفكار وهو ما ينشئ الإعجاب والانجذاب بين الطرفين مما يؤدي مع مرور الوقت إلى التعلق. ولكن هذا التعلق ليس الحب ولكننا كثيرا ما نظنه حب مما يجعلنا في صراع، وحيرة.
الحب الحقيقي ينتج عن اقتناع عقلي ونفسي وعاطفي بالطرف الآخر، وهو الأمر الذي لا يمكن أن يتحقق عن طريق شاشة الكمبيوتر ولكنه يحتاج أن ترى الآخر بعينك وتقترب منه وتصادقه، فالانجذاب قد يحدث بالفعل عن طريق الشات ولكن الحب الحقيقي لا يمكن. فرؤية الآخر لها انطباعها وتأثيرها، والزواج يحتاج للشعور بالآخر والاقتراب الكلي بينه الآخر.
ولذلك فقد قررت عدم الارتباط عن طريق الإنترنت إلا لو شفت البنت، ولو شفتها مش هينفع أني أقابلها مرة واحدة!! ومش عارف إذا كانت أسرتها هتسمح لي أني أقابلها كتير ولا مش هيوافقوا من البداية؟؟؟
هافكر في الأمر من جديد يمكن تبقى مغامرة جديدة ينفع اكتبها..